و ليه مركبي أنا اللي فضة ؟
عشان ده المركب بتاعي !!
ممكن تعتبره نوع من الأنانية .. من المفيد من وقت للتاني ان الواحد يبقى أناني شوية
هي نفس الأنانية اللي بتخليك لما تسرح .. تلاقيك حفرت اسمك .. او أول حرف منه على الورقة اللي قدامك
أو زي ما كل المصريين بيعملوا على حيطان اي مكان أثري .. يروح كاتب أو بمعني أدق " نحت " إسمه .. و جمبه "للذكرى "
بغض النظر بقى تصرف حضاري ,.. و لا مش حضاري .. الدوافع واحدة .. مهما اختلفت ثقافتنا .. او تحضرنا .. كلنا أنانيين
كلنا عايزين نحس اننا مركز الكون
نفسك غالية عندك .. و الحقيقة انها هي كل اللي بيفضلك ..
مش مفيد انك تخاصمها .. مش هاينفع تتجاهلها .. هي جواك .. و أقرب حد ليك
فليه لأ ما أعملش مدونة لنفسي .. لمشاعري .. لأفكاري .. لأحلامي .. هما بالنسبة لي مركب فضة
يمكن انت تشوفها خشب .. ورق
انما ده ما يمنعش ان دول أغلى ما أملك .. أغلى ما يملكه أي بني أدم
عشان كده مش هاتكسف أقول إن المدونة دي انا عاملاها ليا .. عايزة أحب نفسي .. عايزة أكون أنا .. عايزة أدي نفسي مساحة
المدونة دي زي شط فاضي .. أنا و البحر .. و الشمس .. و مركب فضة