محتاجة .. أبطل أدور عليك .. و أبص يمين و شمال ... يمكن أصادف عنيك
محتاجة أبطل أسأل قلبي .. "جاي .. إمتى ؟ " .. و بعدين .. و لحد إمتى
محتاجة .. أقف .. و أبص جوايا .. أشوف ايه اللي وقع .. و إيه اللي لسه معايا
محتاجة .. أرقص .. و أضحك .. و أغني ..
محتاجة أفرح بجد .. أفرح قوي .. و من كل قلبي
مش ابتسامة .. مجرد ابتسامة .. نصها فرح .. و نصها حيرة
محتاجة أكسر حصالة أحلامي اللي محوشاها ليك .. أنا أسفة هاكسرها ..
و أطلعها .. و ألعب بيها ..
هي أحلامي أنا .. و أنا حرة فيها
أزرعها .. و تنبت أحلام جديدة
تروي حياتي .. و أرويها
محتاجة أطرد طيفك من سمايا .. طيفك عزيز عليا .. و كان أغلى ما عندي .. لكنه مجرد طيف
مجرد خيالي السخيف ..
و انا محتاجة أصفي سمايا .. لنور الشمس .. لضي القمر .. و لهمس بكره ..
أنا محتاجة أحس إني أقدر أعيش ..
وإني بيك و من غيرك .. أكون
محتاجة أكسر العقارب و الساعات .. و أنسى كل الحاجات
ليه أيامي تعدي بكل جمالها .. بكل روعتها .. بأحلى فساتينها ..
تترجاني أقوم .. و أقولها " لأ .. أنا قاعدة .. مستنية " !!
لأ كفاية .. أنا مش مستنياك
صحيح بحبك .. صحيح عايزاك
لكن مش مستنياك .. أنا هاقوم .. و أروح و أجي .. و أجري
و لو انت حقيقي .. و بجد .. هتلاقيني .. و هتلحقني
كنت طول الوقت بدور على الجزيرة .. اللي تبقى المرسى .. و تبقى الأمان
لكن الجزيرة جوايا .. و كانت جوايا من زمان
مش محتاجة أستنى تاني .. أنا عمري ما بيستناش
و مش هيسامحني أبدا .. لو ضيعته بلاش
بها موسيقى خفية أضافت إلى روعة المعنى، و رقة الكلمات
ردحذفتحياتي و تقديري يا نورا..