إمبارح .. كان عمري عشرين

من شهرين كده كان عيد ميلادي ( تشرفنا .. أهلا و سهلا .. إيه لازمة المعلومة دي ؟ )
مش قصدي خالص على فكرة إنك تجيب هدية يعني ( خالص على فكرة .. إوعي تفهمني صح !! )
لكن المهم يعني .. إنه كان عيد ميلادي العشرين ( ما تقوليش يا نونووووو )
" عشرين سنة " !!
الرقم خوفني بصراحة .. و فضلت أفكر فيه كتير
عشرين سنة إزاي .. عشرين سنة من إيه ؟ .. طب و حصل فيهم إيه ؟ .. إيه نوع الإنجاز يعني إللى حصل في العشرين سنة دول .. غير إني خلصت ثانوية عامة .. و اللي هو أصلا مش إنجاز .. مصر كلها بتاخد ثانوية عامة
أحاول أفكر .. هرشت دماغي .. مرة .. مافيش حاجة .. هرشت تاني .. مالقيتش حاجة
حقيقي بجد .. و لا حاجة
إحساس مش عاطفي بالمرة إنك تحس إن السنين بتعدي زي المترو .. و انت مش واخد بالك
طبعا مافيش داعي نتكلم عن فترة العشرينات نفسها .. و أنها الفترة اللي بتبني فيها حياتك .. و تحقق فيها أحلامك ..
و إنك المفروض عند سن الثلاثين .. تكون عملت كل حاجة .. خاصة .. لو كنت بنت
سيبنا من الحوارات دي
بس أنا مش عايزة ده يتكرر .. مش عايزة أفوق فجأة .. ألاقيني 40 سنة .. و مش عارفة العشرين الزيادة دول راحو فين !!
لاااااااااااااا .. أنا عايزة أفهم
فضل المركب تايه شوية ..
لحد ما وصل إن الواحد ما بيحسش بالسنين .. و لا بالوقت عامة .. لأنه مش عايشه
أنا مش بعيش اللحظة .. ما بحسش بيها .. ما بدوقهاش .. و ما اعرفش طعمها ايه ؟ بتعدي و خلاص
عدت في إيه ؟ أثرت فيا و لا لأ ؟ .. كانت مهمة و لا لأ ؟ .. كانت لحظة جميلة .. و لا لحظة سخيفة ؟
كل ده ما عرفوش .. عمري ما سألت نفسي الأسئلة دي
و عشان اللي حصل ده ما يحصلش تاني .. المفروض إني أحس كل لحظة
أعيشها بكل مشاعري .. بكل خلاياي .. أبقى فيها أوي .. أبقى واعية اوي أنا عملت فيها إيه .. و هي عملت إيه فيا
كمان إنك ( انا و انت يعني ) تعمل الحاجة اللي انت عايزها بجد .. مش اللي أي حد تاني عايزها .. صحيح الموضوع ده محتاج شجاعة .. و انا لسه ما وصلتش للمرحلة دي .. بس لازم أحاول
لأن في الحقيقة دي حياتي انا .. بتاعتي انا .. ماحدش يقدر يحط نفسه مكاني ..
و المفروض ما اسمحش ان حد يمشيلي المركب بتاعي !!