كان يوم غريب فعلا .. رغم إنه ماحصلش فيه أي حاجة غريبة من أي نوع
ماكانش في أي أحداث مهمة ..
لكن ماعرفش ليه حسيت كأنه نقطة .. وبداية جملة جديدة في شكل أيامي
اليوم ده كان أول يوم أحس فيه بسعادة "غير مبررة " .. و خطين تحت " غير مبررة "
طبعا لازم للعلم . تعرفوا اني طول عمري .. كنت كئيبة بإخلاص
بمعنى إن الإحساس بالكأبة كان العادي بتاعي .. هو الخلفية .. و كل القصاقيص الملونة إللي قدامه دي .. بتروح و تيجي .. بتدوب و تختفي .. و يفضل هو
عشان كده كنت بحس بالكأبة .. بلا مبرر .. و أدور على السبب .. و ملاقيش
لحد ما بطلت الحكاية دي تحيرني أساسا .. مابقتش بحاول أفكر في أسباب
لحد اليوم ده ..
صحيح هو ماجاش فجأة .. أكيد كان له مقدمات
لكني مش فاكرة إيه المقدمات .. و ماقدرش أحددها
يمكن شئ في تفكيري إتغير
شي في نفسيتي .. إللى بتمتص الكأبة زي السفنجة الشرهة .. إتبدل
اللون الرمادي العنيد .. إستسلم لألوان الحياة
هو أنا مكبرة الموضوع ؟ .. يمكن مكبراه .. بس عشان ده حدث بالنسبة لي
أول مرة أجرب الإحساس ده .. و ما صدقت .. حكيت لكل الناس تقريبا عنه
كان يوم عادي زي ما قولت .. صحيح كان أجازة .. بس كان ورايا مذاكرة كالعادة .. فماكانش فيه مبرر للسعادة خالص
بس صحيت مبسوطة جدا
فرحانة بالجو .. فرحانة بالشمس .. و فضلت واقفة قدماها شوية .. و أحس خيوطها على جلدي
اتنفست بعمق .. اتنفست بذمة .. و كأني بشم هوا جديد عليا
السحاب كان شكله رائع .. لدرجة اني فضلت متنحة فترة بتفرج عليه
كوباية الكاكاو .. اللي بعملها كل يوم .. كان طعمها جميل أوي
كل حاجة كانت حلوة .. مع إن ولا حلجة من دي جديدة
الجديد كان أنا .. الجديد كان إحساسي بكل حاجة ( لأ ماحصلش حاجة في اليوم اللي قبله .. و لأ ماكنتش في حالة حب .. و لأ ماكنتش ضاربة حاجة .. وفر ذكائك بقى و اسكت )
أنا سمعت كتير إن السعادة طريقة حياة .. إن السعادة إنت اللي بتعملها بنفسك
بس طول الوقت بحس إن ده كلام نظري
بس اليوم ده كان أول مرة أفهم الكلام ده .. و أعرف إنه حقيقي
أول مرة أدور جوايا عن السبب الخفي ورا سعادتي .. و ملاقيش
بس لما فكرت أكتر شوية إكتشفت إن السعادة هي الأصل
كل الأسباب إللي انت محتاجها عشان تكون سعيد .. هي عندك أصلا .. عندك من ساعة ما اتولدت
عندك خمس حواس .. تحت تصرفك .. بتشوف و بتسمع و بتحس .. عندك مشاعرك .. عندك إحساسك بالجمال .. عندك فطرتك .. و عندك عقلك .. عقلك اللي يقدر يعمل من الفسيخ شربات
و عشان عقلك ده .. عندك عالم غني .. عالم عامل زي المهرجان الكبير .. أوسع من خيالك
عشان تفضل منبهر .. ألوان أشكال .. سما و ارض .. خير و شر .. صيف و شتا .. نهار و ليل
جبال و بحر .. و صحرا ..
و الكون كله جميل .. مع إن ربنا ماكانش مضطر يخليه جميل
يعني ليه مثلا خلى السما زرقة ؟ ليه كان لازم الشجر يبقى اخضر ؟
ليه القمر كان لازم يبقى فضي .. و النجوم بتلمع حواليه ؟
ليه كان لازم يبقى فيه خلطة الألوان العجيبة دي مع كل شروق و غروب ؟
انت ماتقدرش تتخيلها حاجة تانية .. بس كل ده كان ممكن يبقى مختلف .. و في الحالتين ماعندكش سلطة الاعتراض ..
بس انت .. بما إنك أحسن مخلوق في الدنيا .. بما إنك الكائن الوحيد اللي يعرف يبدع .. يعرف يتخيل .. بتعرف تحاكي
لازم كان يبقى إلهامك الجمال .. كان لازم الطبيعة .. أستاذك اللي بيعلمك .. تبقى جميلة لأقصى درجات الجمال .. تبقى كاملة بلا نقص .. تضيفلك كل يوم حاجة جديدة في صمت .. من غير شرح .. من غير رغي .. بالتجربة الحية .. كل يوم
و الجمال ده من غير ثمن .. انت مابتدفعش تذكرة عشان تشوف الشمس يتشرق .. رغم أن المنظر يستاهل
الجمال ده لكل الناس .. غني و فقير .. طيب و شرير .. سواء شافوا .. و لا ماشافوش
سواء تأملوا .. و لا فضلوا باصين بين رجليهم
هايفضل الكون يديلك سعادة .. سواء خدت بالك ولا طنشت
لحد ما في مرة .. في يوم ترفع راسك للسما .. و تشوف و تحس و تسمع .. و ترتوي روحك
ساعتها بجد .. هاتفهم .. و هاتعرف .. انا قصدي إيه